قد ياتيك الابتلاء .......

فى كونك شخصية تهتم بالتفاصيل تهتم بادق الاشياء بادق الملاحظات 

شخصية تحلل كل شيى حتى تصل الى الاس التربيعى و التكعيبى له 

 شخصية تعيش فى التفاصيل المميتة حتى فى طريقة واتجاه وضع القلم

  على المكتب فى طريقة ترتيب المنزل و طريقة وضع الكبريت فى المطبخ

ده ممكن يكون ابتلاء كبير و ابتلاء شديد كمان لان اهتمامك بالتفاصيل فى الاشياء بيكون اضعاف اضعافه  بقا فى الاهتمام بمشاعرك و كلماتك لدرجة انك بترتب الكلام وهو خارج كانك بترتب الدولاب بتاعك بترتب مشاعرك و هتعمل ايه قبل ايه كانك  بطبق الكوفرته على السرير بالطول مش بالعرض عشان بتفرق معاك اوى

 كل ده حلو و جميل اوى لو لنفسك لكن للاسف هنا بقا يكون الابتلاء هو انك بتتعامل مع الناس بنفس الطريقة 

انت متخيل انت بتحسس على كلامك مع الناس و بترتب كل كلمة مع واحد اصلا متعود يرمى الزبالة فى الشارع  ويمشى عادى جدا يعنى واحد ممكن يقولك كلام يموتك وانت عمال تحسس على كل كلمة خارجة منك هو ده بقا الابتلاء انت شخصية متعبة جدا لنفسك مش للناس خالص انت بالبلدى شخصية محسوكة ممكن تهتم بكيس الزبالة اللى بتحط فيه الزبالة و تتعامل مع ناس اصلا 

ممكن تكون بترمى الزبالة تحت بيتهم 

وتعال بقا يا سلام و اتفرج على نفسك بعد الموقف ما يخلص و شوف انت بتعمل ايه و تروح تجيب الكرباج السودانى عشان تفضل تجلد نفسك و تبهدل كرامتك عشان انت فى موقف معين معرفتش ترد الرد المناسب لا وتفضل كمان تفنن لدرجة انك ممكن تجيب ورقة و قلم عشان تكتب الكلام اللى كان مفروض ترد بيه على الناس دى بس طبعا كل مرة انت زى المرة اللى قبلها عمرك ما هترد غير لما الموقف يخلص  و تقعد مع نفسك راجل لراجل و تبدا تعذب فيها وتديها علقة موت

طبعا مع احترامى للزبالة انما انا بستخدمها كرمز للتعامل بس

عارف ايه الحل بقا معاك...............

الصراحة انا معرفش لان انا بتكتب اللى جوايا و بس

هو انا كده طبيعى ولا ايه ......؟؟؟

فى حاجة فيا بتتشال و تتحط اول لما اشوف حاجة ضد الفطرة السليمة اللى ربنا خلقنا عليها ازاى اشوف حد بيعمل حاجة تاذى مشاعر جاره او مشاعر حتى اللى راكب الميكروباص جنبه و اسكت دى مش حشرية دى الفطرة السليمة انك ترفض الخطا

فيه فرق بين التسامح وانى اكون مش بقف على الواحدة و فرق انى اشوف واحد ماشى فى الشارع عمال يشتم بالفاظ قذرة و صوته جايب اخر الشارع و اسكت من غير ما اقوله وطى صوتك عشان عيب

انا رافض اشوف السلبية  اللى بقت فى كل الناس
ازاى اشوف المدام بتروح الشغل و قبل ما توصل مكتبها عمالة تفكر فى ترينج حماده ابنهاوقميص جوزها و اكبر حلم ليها ان الساعة 4 تيجى عشان تجرى تروح و لو قلتلها فى حاجة مهمة يبقا انت اللى محسوك و مستفز وعلى فكرة ده مش فى الحكومة ده فى القطاع الخاص و ربنا

و ازاى تبقا ماشى بعربيتك و 4  كراسى فاضين و التكيف شغال و شايف ناس واقفة هيغما عليها من الحر او من البرد وانت لا تفكر حتى انك تاخد ثواب او بلاش حتى ثواب خليها انسانية لو تكسف هيبقا ده العذر الوحيد اللى مقبول

مش بعرف اسكت لما بشوف حد كان راكب توكتوك بقوله امتهان لانسانيتك ان تركب الشيى ده و متقوليش على قد ظروفىعشان ظروفك هى هى من 4 سنين و مكنش فيه توكتوك

اسكت ازاى لما القى شاب و بنت واقفين تحت بيتنا فى الضلمة و العربية كلها فاميه و الجيران كلهم عاملين من بنها اسكت ازاى طيب     انا بحسبها بشكل تانى لو كلنا سكتنا هو هيعرف انه غلط ازاى و بنتى و ابنى هيعرفوا ان ده غلط ازاى بس الشاب الظريف بدل ما يطلع يجرى حسبها انى دمى تقيل و رخم و الجيران كلهم قالولى مالناش دعوة عشان محدش يتعور

 مينفعش اسكت لما اشوف ناس اسلوبها يقرف و اول ما يفتح بقه تحس ان بلاعة ضربت من كتر اللى بيقوله , ساعتها بحس انى لازم البس بدلة الغطس بتاعت المجارى عشان اعرف اكون اقذر منه عشان يلزم حدوده

عارف ان ده ضد  اخلاق الاسلام  بس الموضوع بقا صعب اوى الناس لازم تقف عند حدودها

 

اﻟﻤﻀﺤﻚ ﺍﻟﻤﺆﻟﻢ ......

اﻟﻤﻀﺤﻚ ﺍﻟﻤﺆﻟﻢ

ﺃﻥ ﺗﻜﻮﻥ ﻭﻇﻴﻔﺘﻚ ﺍﻟﻴﻮﻣﻴﺔ ﺍﻟﺘﻲ ﺗﺬﻫﺐ ﺇﻟﻴﻬﺎ ﻭﺃﻧﺖ ﻛﺎﺭﻩ ﻟﻬﺎ ﻫﻲ ﺣﻠﻢ ﻟﻜﻞ ﻋﺎﻃﻞ

اﻟﻤﻀﺤﻚ ﺍﻟﻤﺆﻟﻢ

ﺃﻥ ﻳﻜﻮﻥ ﺭﻭﺗﻴﻦ ﻏﻴﺮﻙ ﻭﺣﻴﺎﺗﻪ ﺍﻟﺘﻲ ﻳﺮﺍﻫﺎ ﻣﻤﻠﺔ ﻫﻲ ﺣﻠﻤﻚ ﺍﻟﺬﻱ ﺗﻄﻠﺐ ﻣﻦ ﺍﻟﻠﻪ ﻛﻞ ﻟﻴﻠﺔ ﺗﺤﻘﻴﻘﻪ 

اﻟﻤﻀﺤﻚ ﺍﻟﻤﺆﻟﻢ

ﺃﻥ ﺗﻜﻮﻥ ﺑﺸﺮﺗﻚ ﺍﻟﺘﻲ ﻻ ﺗﻌﺠﺒﻚ ﺇﻣﺎ ﻟﻠﻮﻧﻬﺎ ﺃﻭ ﻟﻮﺟﻮﺩ ﺑﻌﺾ ﺍﻟﺒﺜﻮﺭ ﻓﻴﻬﺎﻫﻲ ﺣﻠﻢ ﻟﻤﻦ ﺍﺣﺘﺮﻕ ﻭﺟﻬﻪ، ﻭﺟﺴﻤﻚ ﺍﻟﺬﻱ ﻻ ﻳﻌﺠﺒﻚ ﻷﻱ ﺳﺒﺐ ﻫﻮ ﺣﻠﻢ ﻟﻤﻦ ﻓﻘﺪ ﺻﺤﺘﻪ ﻭﻫﺪّﻩ ﺍﻟﻤﺮﺽ 

اﻟﻤﻀﺤﻚ ﺍﻟﻤﺆﻟﻢ

ﺃﻥ ﻳﻜﻮﻥ ﺃﻃﻔﺎﻟﻚ ﺍﻟﻤﺰﻋﺠﻮﻥ بمستقبلهم و متطالبتهم ﻟﻚ ﻫﻢ ﺣﻠﻢ ﻟﻤﻦ ﻟﻢ ﻳﺮﺯقهم الله ﺑﻬﻢ

اﻟﻤﻀﺤﻚ ﺍﻟﻤﺆﻟﻢ

ﺃﻥ ﻳﻜﻮﻥ ﻭﺍﻟﺪﺍﻙ ﺍﻟﻠﺬﺍﻥ ﺗﺮﺍﻫﻤﺎ ﻛﺜﻴﺮﻱ ﺍﻟﻄﻠﺒﺎﺕ ﻫﻤﺎ ﺣﻠﻢ ﻟﻠﻴﺘﻴﻢ

اﻟﻤﻀﺤﻚ ﺍﻟﻤﺆﻟﻢ

ﺃﻥ ﻳﻜﻮﻥ ﺑﻴﺘﻚ ﺍﻟﺬﻱ ﻻ ﺗﺴﺘﻄﻴﻊ ﺍﺳﺘﻀﺎﻓﺔ ﺃﺻﺪﻗﺎﺋﻚ ﻓﻴﻪ ﻷﻧﻚ ﻟﻢ ﺗﺴﺘﻄﻴﻊ ﺗﻐﻴﻴﺮ ﺃﺛﺎﺛﻪ ﻫﻮ ﺣﻠﻢ ﻟﻤﻦ ﻳﻌﻴﺶ ﻓﻲ ﺍﻟﺸﺎﺭﻉ

اﻟﻤﻀﺤﻚ ﺍﻟﻤﺆﻟﻢ كل الالم  ﺃﻥ ﺍﻟﺤﻴﺎﺓ ﺍﻟﺘﻲ ﻧﻌﻴﺸﻬﺎ ﺟﻤﻴﻌﺎ ﻳﺘﻤﻨﻰ ﺍﻟﻤﻮﺗﻰ ﺃﻥ ﻳﻌﻮﺩﻭﺍ ﺇﻟﻴﻬﺎ ﻟﻴﻌﻤﻠو صالحاً

ﻫﻠّﺎ ﻗﻠﺖ .. ﺍﻟﺤﻤﺪ ﻟﻠﻪ ﻣﻤﺘﻨﺎً ﻟﺮﺑﻚ

كلمات مبعثرة  منقولة لم يعرف بعد كاتبها الاصلى وان كانت حقا هذه الكلمات كلها اخبرنا بها الله سبحانه و تعال

الحب فى بامبوزيا

مفيش صورة تعبر عن حالنا اكتر من الصورة دى

 كل حاجة فى جمهورية بامبوزيا بقت ماشية بالحب اى حاجة عايز تعملها  مبتتعملش غير بالحب و الترضية و حبة عليك و حبة عليا و معلش انت الكبير و حصل خير لكن تقولى تاخد حقك و القانون و الكلام ده يبقا بضيع و قتك ووقتنا و تبقا مش فاهم حاجة

لو الميكانيكى قرفك و بوظلك العربية  اوع تتهور و تقوله انت بوظتلى العربية و رجعلى فلوسى تبقا اهبل لازم تكلمه بالحب ولازم تكبر مخك عشان امورك  تمشى

لو مستنى صنايعى يعملك حاجة فى الشقة و وبقاله 3 ايام بيقولك ساعة و اجيلك اوع تفكر انك تقوله انت مش محترم عشان بتضيع وقتى وانا هشوف صنايعى تانى لانك لو عمليت كده هتستنى كمان 3 ايام مع الصنايعى الجديد لازم تيجى على نفسك و تكلمه بالحب عشان متبقاش خسرت 3 ايام اونطة 

لو عملت حادثة بالعربية و التانى هو اللى غلطان اوع تفكر تتصل بالشرطة عشان  تثبت حالة و حقك ميضعش حاول تسمع كلام ال 150 واحد اللى هيتلموا جنب العربية و يقولولك معلش حصل خير و سليمة وفداك و المسامح كريم عشان لو مسمعتش الكلام و اتصلت بالشرطة هيجى امين الشرطة ياخد الرخص منكم و بعد ما الناس تمشى هيقولك يا بيه معلش و حصل خير عشان انت لو رحت القسم مش هتاخد لا حق ولا باطل و معلش حاول تاخد منه اللى تقدر عليه وخلص نفسك

ولو رحت تطلع تجدد رخصة العربية اوع تفكر انك تتحمق و تقول ايه القرف ده و ايه الروتين ده حاول تفتكر القاعدة الذهبية لاطالة النفس وهى معلش يوم و يخلص و هدى نفسك عشان تخلص و تروح عشان الامور تمشى

ولو اشتريت اى حاجة و غالبا هتكون صينى و باظت بعد ما روحت بساعتين اوع تفكر ترجع للمحل ترجعها عشان هتتخانق خناقة لرب السما و برضه هتمشى قفاك يامر عيش و هترميها و تشترى واحدة تانية وكبيرك اوى هتاخد موقف و تقرر انك مش هتشترى من المحل ده تانى

  واوع تسأل ؟؟؟ هى الحكومة ازاى بتسمح باستيراد بضاعة بمواصفات زى الزفت و الناس ترمى فلوسها فى الارض  وازاى الحكومة فى بامبوزيا تسمح ان المواطن يدفع فلوس فى منتجات رديئة زى دى 

لانك لو سالت السؤال ده تبقا غبى

لان الحكومة فى بامبوزيا بتسمح للقنوات الفضائية بتاعت الافلام انها تعمل اعلانات عن مرهم  بيعالج 580 مرض بدهنة

  ده طبعا غير اعشاب المعجزة اللى بتخاليك حصان طروداة فى قوضة النوم حتى لو عندك 75 سنة

اوع تفتكر ان ده دعوة  للتفكير ولا حاجة بالعكس تماما دى دعوة للحب و التعايش مع الواقع

 وبالحب بالحب بالحب